Tarix: 22-12-2018 14:00                                                                                                 Oxundu:109
Virtual karabakh

Gülməli başçı: jurnalistə saxta “Tissot”, tələbəyə 20 qəpiklik “ruçka”, şagirdə 52 “razmer” mayka...

Nəsimi rayon icra başçısı Asif Əsgərov əlamətdar günlərdə özünü yaxşı təqdim etmək istəyir. Bu vaxt da “qaş düzəltdiyi yerdə, göz çıxarır” və gülməli vəziyyətə düşür.

Cahan.info xəbər verir ki, daha əvvəl jurnalistlərə saxta “Tissot” saatı bağışlamış A.Əsgərov bu dəfə Əlillər Günü münasibəti ilə beşinci sinif şagirdinə 52 “razmer” idman maykası hədiyyə edib.

Qarabağ veteranı Əhməd Rəhmanov feysbukda yazıb ki, 268 saylı xüsusi məktəbin 5-ci sinif şagirdi olan oğluna 52 ölçülü mayka veriblər:

“Düzdü, bu mayka mənə də böyükdür, əlilliyi olan uşaqlara göstərdiyiniz bu nəvazişi görəndə ailəliklə sevincdən “gözümüz yaşardı”.

Çünkü ağlımıza gəlməzdi ki, cənab məmurlar bu uşaqların naminə kiloqramla satılan geyimləri almaq üçün öz qızıl vaxtınızı ayırıb “Sədərək” bazarına gediblər”.

Veteran yazıb ki, Azərbaycanda dövlətin əlil uşaqlara verdiyi müavinətlər yaşayış minimumundan 2 dəfə aşağı, əlilə qulluq edən valideyn isə ümumən dustaq yerinə qoyulub, müavinət almır:

“Amma əsas bu deyil. Əsas sizin bu əlil uşaqlara əyinlərinə olmayan mayka kimi böyük ölçüdə ayrılıb.

Amma uşaqlara çatmayan məbləğlərdir ki, onu da hər bayramda əlillərin sağlığına həzm eləməyinizdir. Allah sizlərə dəyməsin, çünki Allah dağına baxıb qarını verdiyi kimi, bizə baxıb Sizi verib”.

Tamamilə haqlıdır, Allah dağına baxıb qarını verdiyi kimi, bizə baxıb Sizi verib. Bu məmurlar niyə insanları ələ salırlar, başdansovdu işlər görürlər, uşaqları sevindirmək üçün normal hədiyyələr almırlar?

Nəsimi İH məmurları bu hədiyyələr üçün kim bilir nə qədər pul silib. Ancaq əlillər günü məktəb şagirdinə uyğun ölçüdə geyim tapa bilmirlər.

Üstəlik, mayka yox, bir ayaqqabı, köynək hədiyyə etmək olardı. Doğurdan da bu yerdə “ölüb yerə girmirsiniz” sualı vermək yerinə düşür.

2015-ci ildə Səbayel Rayon İcra Hakimiyyəti başçısı işləyəndə Asif Əsgərov 22 iyul Milli Mətbuat Günü münasibətilə bir qrup (75 nəfər) jurnalisti mükafatlandırmışdı.

İcra hakimiyyətindən yayılan məlumatda deyilirdi ki, jurnalistlərə “qiymətli hədiyyələr” təqdim olunub.

Əslində isə məlum olmuşdu ki, həmin “qiymətli hədiyyə” Çində istehsal olunan və bu ölkədə 6 dollara, Azərbaycanda isə 20-30 manata satılan saxta “Tissot” saatlarıdır.

Nəsiminin icra başçısı daha sonra 600-dən yuxarı bal toplamış tələbələrlə görüşüb. Tələbələri təbrik edən və onlara uğurlar arzulayan A.Əsgərov yekunda mükafatları təqdim edib. Bir qrup valideynin verdiyi xəbərdə bildirilir ki, icra başçısı tələbələrə 20 qəpik qiyməti olan qələm bağışlayıb.

Cahan.info reportyor.info-ya istinadla xəbər verir ki, medianın gündəmindən düşməyən Bakının Nəsimi rayon icra başçısı Asif Əsgərovun yüksək siyasi kulislərdə “qələminin qırıldığı” haqda xəbərlər sızmaqdadır.

Hakimiyyətin yuxarı eşelonunda A.Əsgərovun üstündən xətt çəkildiyi qənaətinə gəlindiyi bildirilir.A.Əsgərovun deputat Adil Əliyevdən 30 min manat rüşvət istəməsi iddialarının meydana çıxması onun işini bitirmək üzrədir.

Onsuz da ötən illər ərzində fəaliyyəti və ələxüsus oğlu İlham Əsgərlinin avtoqəzada bir nəfərin həyatına son qoyması Nəsimi icra başçısının dosyesini kifayət qədər ağırlaşdırmışdı.

Deputatdan 30 min manat istəməsi iddialarının tirajlanması İH başçısının vəziyyətini daha da mürəkkəbləşdirib.

Əslində, A.Əsgərovu keçmiş baş liftçi Qüdrət Şükürovun aqibəti gözləyə bilər. Onun da mənimsəmələri ortaya çıxmışdı və cinayət işi açılmışdı.

Əgər Nəsimi İH başçısı vəzifəsindən kənarlaşdırılsa, deputatdan pul istəməsindən tutmuş büdcə talanı, qanunsuz tikinti sərəncamları, yaşıllıqların satılması ilə bağlı sorğu-sual oluna bilər.

Mənbə bildirir ki, yuxarılarda A.Əsgərovla bağlı ciddi şəkildə qəzəb var. Buna səbəb deputata qarşı belə tələb irəli sürməsi iddiasıdır. Bu halda icra başçısının sadə vətəndaşların başına hansı oyunları gətirdiyini təsəvvür etmək olar.

Məlumatlı qaynağın sözlərinə görə, şəhərin Nəsimi kimi mərkəzi rayonuna adı qalmaqallarda çəkilən məmurun rəhbər olması istənilmir.

RİH-nin mövqeyini dərc edə bilərik.

Digər Dünya xəbərləri